Bassy - Love Vine
April 15, 2011
Here is ah second warning

Ah don’t like to go back to things ah write, ah left dat to school pickney when de time come; but last week ah ended de article like dis: “ Ah want to warn Gone-soft and his bunch ah evil members again, to reinstate de teachers.{{more}}

De tears and unwarranted hardship dah de families ah dem teachers going thru, will fall heavily on every one ah dem.” Ah find it strange dat ah freak flood swept thru de Windward side ah de country; and is like somebody send dat flood to devastate the three constituencies foh Gumry Daniel, de Prime Minister and Sue-both-toe to remind dem about de suffering of de families ah dem three teachers: Elvis Daniel, Johnson and Bash Thomas who ran ‘gainst dem in de same three constituencies and lost.

Me ain’t no prophet and me ain’t trying to predict nuttin, but de Lord does ley de rain fall pon de just as well as de unjust. It is blatant spite wuk not re-employing den three Teachers and de Dispenser Cut-dis Bowman. How does Gone-soft explain Slater who didn’t run back, get back ah ministry, Tom-son ran and lose he get back ah wuk, Snagg and Her-man ran lose, and dey get back de wuk as administrator ah de Grenadines; Glen Beach didn’t run back, he get ah big wuk to change Vincy the Parrot to Vincy de Sea Gull; Sell-boy didn’t run back, he get big wuk in de N.Y. mission, lie-in Lie-Za say de pastor who was asked to hand in his gown getting big wuk under Sell-boy, wid Lie-Za yuh cant swear. Elvis Charles ran and lose, he get big wuk senator poze. Tings never brown wid de Brownes, David Browne ran and lose he get big wuk, senator and speaker’s deputy; Mike Browne didn’t run back he get big wuk, he get even de lickle IFSA cheerman wuk dey tek way from Claude Samuel. Julie-ann get big wuk too, but in all fear-ness, he is de only one dat is productive. My question is, why is it fair dat all ah these people could get employment after elections, earning tens ah thousands ah dollars per annum salary, but Elvis Daniel, Bash, Johnson and Bowman cannot be reinstated to dey jobs in de service? Ah feel passionate about this matter especially when ULP supporters are being brain-washed wid statements like “ own de Calm-Pain” den “Own de Guv-ah-mint”; and dis is exactly what dey doing, room only foh ULP. It stinks, but when de King rules wid an evil hand de people will suffer! Dat’s ah second warning!


If Sir James was not ah Brey Nansi ah would ah say HE MEK P.M. Gone-soft carry HIM back to Grenada and walk him thru ah Cocoa field this time. And den again foh Sir James to hand over de Cocoa deal to de Guv-ah-mint and not even hinted his intent to Arm-In and de NDP, leaves everybody guess-tek-ah-licking. Ah was telling Lie-Za ah don’t like how Sir James drop it, but it got to be more in de matter dan de pistle. Everybody notice dat since elections finish, no Sir James! Like he went into hibing-near-shun; is either Sir James dun wid dem fellars in NDP or dem dun wid Sir James. Lie-Za is plain Jane when she ready, she ask me if ah remember de story wid de cow dah did give ah full seventeen gallon bucket ah milk; de fellar who was milking de cow thought he had it all covered, de moment he get up from under cow to move de bucket, “Bap”! de cow kick it to hell over. De good side ah dis Cocoa deal is dat as painful as Arm-in sounded, he said he supported de project. De bad side is dat dis no show wid Sir James and his party could mean bakes widout Cocoa-tea foh Arm-In


Ah got to give Lie-Za ten out ah ten foh her response to de PM’s proposed trip to de UK to attend de Royal Wedding. She say an aunty-co-loan-yell-is entering Buckingham Palace, dah like ah sacrilege, unless he going to cuss off Betty and tell her Shove-his say to tell she, free up SVG. Den she ask me if ah know de Nursery Rhyme “Pussycat Pussycat”. How de origins ah dat “Pussycat pussycat” rhyme dates back to the history ah 16th century Tudor England. One ah the waiting ladies foh Queen Elizabeth Ist had ah old Tom-cat dat uses to roam throughout Windsor Castle. On one particular occasion the cat ran beneath the throne where de tail brushed against the Queen’s legs, she scream-out (foh joy). Luckily foh de ole ram, ‘Good Queen Betty’ had ah sense ah humour and decreed that the cat could wander about the throne room, on condition it kept de place free ah Red Rats! Lie-Za stop dey, to crown it off she say she writing ah Kaiso foh de new song competition dis year and she want Cherry Ince or Frankie Mack to arrange de music foh she, de chorus ready she say: “Pussycat pussycat, where have you been?”
“Ah been up to London to visit the Queen.”
“Pussycat pussycat, what did you dare?”
“Ah frightened a little Red Rat under she queen rocking chair”
“MEOWW”! And wid dat is gone I gone One Love Bassy.

Bassy Alexander is land surveyor, folklorist and social commentator.